Destiny

Mahni in lum chhuahsana phai lama lehkha zirna lamah 2003 kum khan duh deuh mai ka tawng ve a. Kan induh atanga kar 1 awrh hnu maiah chuan an in lama haw a ngai a, a haw ta a. A haw dawn tum chuan rel station thleng ka va thlah a. Rel tlan dawn lai te chuan a mitah mittui a tling piau a.

Kar hnih in lama a awm hnu chuan a lo haw leh a. A haw hlan hian nasa takin ka rilru a insiam a, Zolawmsangi hlaa 'hlun lo tur hmangaihna par tlan reng ai chuan' tiin thian tha tak angin kan inthen ta a. Hnam hrang chu ni lo i la, tun thleng hian kan la ni reng tur hi a ni a! Mahse, chu chu ka destiny tur a lo ni tih chiang takin tunah hian ka hre tain ka hria.

Amah nena kan nih tak loha vanga ka chunga thil lo thleng leh ka thil tawn zawng zawngte-ah hian vuina tur leh lawm lohna tur ka hmu reng reng lo. Kan inthen hnua ka vui ve teuh berna chu inthen tirha amah ka duhna vanga keimahin ka tawrhna kha a ni -- inthen tawh mah i la ni tin inhmuh kha a ngai thin si a.

Amah nen kan nih tak loh vanga ka nih tur pawha ka rin loh thil ka nih te, ka chan phak loh tur thil ka chan te kha ka ngaihtuah let hian amah vanga ka rilru lo hrehawmna te kha engahmah ka ngai ta lo a, ka mittui lo tla zawng zawngte pawh kha pawi tihna ka nei ngai ta lo.

Tichuan, hun a lo kal zel a, kum 5 zet a lo vei ta reng mai! Kum 5 kaltaa thil thleng kha thleng nawn leh dawn ni tlata hriatna ka nei, hriatna han ti i la -- ni tura rinna -- a ni zawk mah awm e. Engvanga chu chu ring nge ka nih ka hre hauh lo thung. Mahse, 'ngaihzawngah zu buai lo la, lehkha zir tura kal i ni a, lehkha zu zir la,...' tia thu min chahtu khan ka destiny a hre lawk em ni ang? Mahse destiny chu a thlak theih an ti alawm ti chung chuan kum 5 kaltaa thil thleng kha a thlen tawh loh hram na turin ka theihtawp tak meuhin ka bei ta a.

Tuna mi pawh hi a hma ang bawkin han inchhai teh lua awm loin, awm dun ngun leh mitmei atang chuan kan induhna chu kan lanchhuahtir leh a. Heti ringawt maia han nih leh tak chu rilru a nuam lo tan pang mai a. Kawng ngai zawh tawh lohna'n a theihna chin chinah pen ka tum ta ngat ngat a. Amaherawhchu, kawng hrang chu han zawh thinin, thiam ang ang chuan han zawh zel tum mah i la, pengthuamah chuan a hmaa mi tho-ah kan chhuak leh thin.

A kawng chu hrang mah se pengthuam ngaiah, ngai leh ngai tho kan hmu thin.

Kan induh atanga kar 1 awrh bawkah chuan ani pawh chu haw a ngai leh ta! Hei zet hi zawng mak ka ti! Ani pawh chu a hmaa thil lo nih tawh dan ka hrilh hial a. Ka thiante zawng zawng pawh ka hrilh vek a. An nui ral mai mai thung a.

Kar 2 vel an cham hnu chuan an lo chhuk leh ta! Hei le, engtin nge ka tih dawn ni ang le? Destiny chu destiny a ni, i change thei lo. Ni lo, i destiny i thlak thei... Rilru a buai ngei mai le! Engpawhnise, a hmaa ka tihsual zawng zawngte kha siamthat phawt a ngai ta a ni. Ka lo kal tawhna kawng ngaiah khan kal tawh loha pengthuam ngaiah pawh chhuah tawh loh a ngai ang.

Kawng ngaia kal lo tur chuan ka theihtawp ka chhuah ta a. An lo thlen ni chuan lo hmuah hram ka duh a. A chhan chu a hmaa mi kha a lo haw let ni khan ka len bosan lui tawh a. Ka lo hmuak ta ngei mai a. Tichuan, kawng dang chu ka zawh tan ta a.

Mahse, ka vela thil reng reng chu thunun theih lek loh hian a awm ta vek mai hian ka hre thin. Min hual veltute hian kawng ngai zawh leh tur hian min nawr a, chu lamah chuan min khalh luh luih hi an tum tlat emaw ni chu ka ti hial a ni. Pengthuam hmasa kha ni chiah si lo, ni awm ang deuh deuhte chu ka pawh leh hlawl thin a. Kal dan hriatthiam a va har thin tak em! Nge ni, hei hi hringnun zinkawng an tih thin chu ni ang, ka buai!

Tun tum chu thil engkim a fuh dawn e, tiin ngaihtuahna ka seng tan a. He ka kalkawngah hian peng pakhat leka ka pen sual vangin heti tak hian kawng ka bo a, ka hmangaih ber chu ka chan tawh a ni si a. Chumi kawng ka lo zawh tawh, ka zawh sual tawh chu zawh nawn leh tawh lo turin ka theihtawpa ka tan hnu chuan kawl eng a lo lang tan ta a. A haw hmaa kan hlim ang tho khan kan hlim leh tan ta. A hmaa ka tihsual kha destiny a nih chuan, tuna ka tihdik chin pawh hi ka destiny chu a ni tho ang.

Ka destiny chu ka thlak thei tihna em ni?