Anpai Lanu piancham

Huiham! Han ti kawk phawt mai i la. Rilru hrehawmnate chuan mi kiansan zai a rel si lo a. Piancham lawm azawngah chuan ka hlim lo ber awm e.

Birthday card lei turin tlaiah ka chhuak ve a. Tun hmaa Hostel-a kan lo awm hona thin kawng phei velah chuan ngaihtuah a thui duh ngei mai. 'A hmun leh tlangte dang si lo' tih ang mai khan engkim mai chu a la pangngai vek mai si a. Kawng kam tawna in dingte chu a ngai ngaia lo la awmin, chu hmun khawhar leh reh em em mai chu an lo nghak a. Mahse, rilru lamah kim lo a awm tawh tlat! Hmana hemi kawnga kal ţhin kha chu ka ni tawh lo. Thil re re chu a hlimthla mai ni hian a hriat vek mai a.

Lungrual taka rilru inpawh leh hlim em ema kan nuih dun lai te kha mitthla-ah mai an lo chang zo ta! Mitthlain kan nuih dun bawk bawk lai te, kan kalna ţhin kawng leh len velnaa kan awm dun lai te chu ka hmu uai uai a. Mahse, va pawh theih a ni tawh si lo. Hunin min lo dai dang tawh si a!

Sawm ang chuan ka han kal ve a. Mahse, hlimna tak tak a awm tawh chuang lo. Ka lungchhiat zual lai phei chuan, engati nge ani nen kher kher hian kan lo intawn ka ti hial ţhin a ni. A hmel hmuh lohin hrehawm ka ti a, a hmel hmuh lahin a hrehawm leh tho si a.

Hnam kar hi chu hrang kher lo se, eng nge buaina awm chuang ang? Amah ang hi Mizo nula an awm ve ang chu maw! A va han pawi tak em, tih mai loh chu han sawi tur a awm si lo a.

Inhmuhthiam lohna a awm loh si chuan, a rei telh telh ang a, induhna a zual tawlh tawlh mai dawn chu a ni si a.

Mizo hnam ka hmangaih avang hian ani chu ka ţhen a. Mahse, hnam inpumkhatna tih te chu beih rual loh khawpa harsa, thil tih theih loh niin a hriat tho si a. Ka duh ber ka ţhen phahna Mizo hnam hi belhtlak a ni chiah em? Kan ram hruaitute hian a inpumkhat zawngin nge hna an thawh a, a inteite zawngin? A nih, ka duh ber chu ka ţhen a, Mizo hi belhtlak a awm leh dawn si loh chuan, ka tan eng nge hmachhuan tur awm ang?

"Mahse e, ka duh ber Anpai Lanu, pasal i neih hma chu e, nupui ka nei bik lo ang e. Duh leh nupui nei lo pawhin leng tar ţhak mai ang. Mizo hnam dalna a nih ai chuan piang lo law law mai rawh se!"

Mizo, nangmah vang hian a nia aw ka duh ber ka ţhen ni! Belhtlak i awm leh si lo a nih chuan, ka tan nun hian awmzia a nei lo ang.

Aw! A rei tulh tulh a, hmangaihna a zual tulh tulh a. Insum zawh loh hunte chu a lo la her tih a hlauhawm zawk hial a ni. Inhmu reng leh inbe reng theia awm hi kan tan chuan a ţha lo zawk dawn chiang reng mai si a. Tuna kan awm dan ang hi chuan insum zawh loh leh duh reng vang pawh ni lo a, 'nih' leh mai a awl awm si a.

Awm hran dan ngaihtuah chu a ngai a nih hi. Thil engmah hi a bula ţanga ţan ţhat leh theih a awm lo. Mahse, tuna ţang hian tihţan theih dan chu a la awm.

Popular Post

PAN Card leh Aadhaar link dan

Khampat Bungpui zar pakhat tliak

I Gmail inbox unread mail zawnchhuah dan

Twitter-ah PM Modi-a'n White House lehthal

Hnar arngeng

Advertisement in Facebook