Featured Post

TDS doa duty a ṭul em?

Central YMA Executive Committee chuan March ni 16, 2019 khan Tax Deducted at Source (TDS) chungchang ngaihtuahin, NGO Co-ordination Committee meeting-in he thil hi sût a nih loh chuan Mizoram chhunga State Bank of India (SBI) Branch-te hnathawk thei lo a dan a lo rel chu tha tiin a hlawhtlin theih nan theihtawp chhuaha hmalak a rel a. YMA Sub Hqrs., Group leh Branch te chu mahni area theuha SBI Branch-te a tul angin March Ni 20 atanga hnathawk thei lo tura hma lo la turin a hriattir a ni.

Mipui nawlpuiin kan hriatthiam dan tur chuan TDS hi India rama Income Tax lakna hmanrua/kalphung pakhat tiin a sawi mai theih awm e. Indian Income Tax Act of 1961 hnuaiah lak a ni a. Hetih lai hian India ram rau rauvah pawh Hmarchhaka chengte hi kan dinhmun a la chhe bik a, income tax laksak tlakah min la ngai lo va, chuvangin he Act-a Section 10(26) ah chuan Nagaland, Manipur, Tripura, Arunachal Pradesh, Mizoram leh North Cachar Hills, Mikir Hills, Khasi Hills, Jaintia Hills leh Garo Hills leh Jammu and Kashmir-a Ladakh region-a awmte chu TDS hi laksak ve loh (exempt) tur tih a ni nghe nghe.

Hetih lai hian Parliament Budget Session hnuhnung berah khan Bank Account-ah kum khat chhunga an pawisa pung (interest) cheng sing khat (10,000) tling chin chunglamte hnen atanga a pung zat 10% lak thin chu cheng sing li (40,000) ah tihsan a ni dawn tih Finance Minister Piyush Goyal chuan Interim Budget 2019 speech-ah a sawi lang a. Hemi avang hian State Bank of India chuan an banking system tidanglam hretin, chhiah lak dan thar hi an dah luh (introduce) a ngai ta a. Chu an tihdan thar chu India ram puma SBI zawng zawng a huam tak avangin exempted list-a mite pawh chhiah laksak tur ang a lo ni ta a. Chu chu tuna Central YMA-in a buaipui hi ni tain a lang.

A tirah All-NGO Co-ordination Committee meeting-ah sawi a ni a, chutah chuan CYMA pawh telin, a hnuah CYMA chuan a hranpain All-NGO Co-ordination Committee meeting thurel chu thlawpin, an hnuaia awm Sub-Headquarters, Group leh Branch-te chu hma la turin a hriattir ta a ni.

Mipui rorelna ramah chuan mipuiten kan dikna chanvo ni-a kan hriat humhalh tura hma kan lâk a thiang a. Hmarchhak Tribal, TDS exempt tura danin min huanghung thlap kan ni a, SBI-in TDS min tihsak ve tur kan lo do tur hi a hriatthiamawm khawp mai. Chutih lai chuan heng hi ka ngaihtuah -

1. TDS-in a huam turte hi mirethei an ni lo. Kum khat chhunga an bank account-a sum awm atanga bank interest cheng sing khat tling chinte chauh chhiah laksak an ni dawn a. Chu pawh chu an pawisa atanga laksak tur ni lovin, bank interest atanga laksak tur an ni a. Chuti chunga CYMA hotuten Branch, Group leh Sub-Hqrs-te Bank hnathawk dang tura hriattirna a chhuah ta mai hi a dik ber em le! Tin, YMA kumpuan ram leh hnam humhalh nena sawi zawm a ni phei hi chu eng ang chiaha inzawm leh TDS hi eng ang fakauva hlauhawm nge a nih ang?

2. TDS duh lovin Bank hnathawkte hi dang ta ila, a dang tura kal khawm tam ber hi TDS-in engti hawi zawng maha a huam ve phak loh tur, Bank account-a a pung ringawt kum khata cheng sing khat tling pha tur khawpa sum dah thei lo kha a tam zawk kan ni dawn!

3. Mahni hna tul kalsanin Bank hnathawkte kan dang ang a, kan buai ang. Bank hnathawkte erawhin hna thawk lovin hlawh an la tho ang. SBI-in pawisa an pe chhuak thei lo ang a, bazar-a thlai thar zuar, ei chawp zawngten an tuar leh ber ang em?

4. TDS hmanga pawisa laksak tuar turte hi mi hausa, officer lian leh pensioner hausa, Minister leh contractor liante an ni deuh ber mai a. Anniho avang hian YMA member rethei ve tak takte hian Bank hnathawkte kan lo dang dawn tihna a ni em?

5. Mizoram SBI hotuten All-NGO Co-ordination Committee hotute hemi chungchanga biak an tum pawh be duh lo va, Bank hnathawktute dan tumna a lian viau hi a chhan ka hrethiam lo. Bank hnathawktute pawhin an hmunpui - SBI Corporate Level, Mumbai lamah theihtawp chhuaha Mizo-te TDS deduct ve lo tura hma an lak laia buaina lo siam kher kher tum hi eng nge maw a tulna le!?

6. Mizoram sorkar pawhin he harsatna hi hriain, hma a la mek bawk tih a ni a, chuti chung chuan CYMA-in heti tak maia hmanhmawha a nawrna chhan hi eng nge ni ang?

7. CYMA hian TDS issue, hnam thil ti-a an sawi hi eng ang chiahin nge an ngaihpawimawh ni ang? Hetiang khawpa ram leh hnam humhalh ngaihna thil a nih a, Mizo nawlpui (YMA member kan ni deuh vek a) kan phek buai dawn a nih chuan kan thil tih tur hi chiang takin mipuite hian kan hre ve tur a ni dawn lo'm ni? Chumi hriattir a, mipui zirtir chu CYMA bat a ni ang em?

TDS chungchanga CYMA-in hma a lak tumna chhan hi Sub-Hqrs leh a hnuailam zawnga hruaitu tam zawk hian an hrethiam vek lovin a rinawm a. CYMA hruaituten ram leh hnam hmangaihna (patriotism) changchawia a nawr chuan ram leh hnam hmangaihna thinlung pu YMA hruaitu leh YMA member-te chuan haw-hawin kan bawh leh mai dawn tihna a ni a. Chiang taka inhrilh fiah si lova hma inlaktir hi hlauhawm tak niin ka hria.

8. TDS Exemption hi dil dan hrang hrang a awm a, chu pawh chu CYMA hotute hian keini ngawt ai chuan an hre chiang ngei ang. Chutiang awm reng chunga Mizoram pum huap issue lian tak nihtir an tum kher kher hi eng nge a chhan bulpui ber ni ang le?

Heng ka ziahte hi keima mimal hriat dan leh ngaihdan a ni a. Dik lo leh fuh chiah lo pawh a awm maithei a, mi zawng zawng ngaihdan a ni lo dawn chiang sa bawk a. Tute emaw sawisel tumna leh a ngiaunger zawnga thil lâk tumna lam a ni lo va, awmhmuna ka lo thlir ve dan mai a ni e.

Cp

Comments

Buy Online! Home Delivery!!

Popular Post

Mizo Doctor hmasa - Hmunṭha khaw lal daktawr

MLA LAD Fund hman theihna leh hman theih lohnate

Windows leh Android-ah Mizo Ṭawng dik takin i chhu tawh ang u

Sailam Lal Bengkhuaia Pasalṭha Chawma, James Winchester thata a fanu Mary Winchester sala mantu - Chungtea

Mizoram Sana - The Mizo Meridian