Ruah do mai ka thlang ta zâwk a!

Vawiin chu ka hnathawk haw ruahpui vanawn surin min nan hman avangin kawng kama chawlhbûk an sakah vai ṭhenkhat nen kan tawm a. Bus service a lokal a, min lawnsan diak a.

Tlema a han deuh laiin han kal ka tum uk a, a han lehzual ka nghah laiin a rawn tam leh deuh a, naupang pahnih ar pawm hi ka tawmnaah chuan an rawn tawm ve a. An ar pawm chu eng ar nge tih ka zawh chuan Ṭai leh engemaw ni thlahpawlh an ti a. An insualtir a lo ni a. Naupan lai an tingaihawm viau. Ṭhianpa pahnih Malsawma leh Rochhuanga hian ar pawm hi an ching ve viau a, Zo ar chhuang hlai hlep hlup ang chi kan pawm chang chuan Kawl ar kha chu an ngam meuh lo ṭhin.

Chutah ṭek rawn tla phe ri zawk chuan ngaihtuahna kal ding lai a rawn titawp a. Ruah mal lian pui pui, thli na deuhin a rawn chhem chuan kan tawmna chu a rawn theh huh deuh vek mai a. A hnu deuhah hmeichhe scooter khalh pakhat hi ruah kawr a ha vek chung siin a rawn tawm lût ve a. Ruah a tam em em vangin a tlan lui hlei thei bîk chuang lo a ni. Hmuamda vel a din hnuin a kal leh ta a.

Mahniin ka ding leh ren rawn a, ruah la chu thliin sir tin maiah a chhem leng kual vel a. Chutah nu pakhat hi a rawn tlan lût ve leh a. Kan pahnihin kan awm dun a, a va sur duh ta ve, a va sur rei tawh ve kan tih kan tih hnu chuan ruah kawr ha leh ha lote, huh zawr hnîp hnêpin an rawn tlan leh zauh zauh ṭhin a.

Kan tawmna chu a hul loh êm avang chuan a rawn theh seng sengna lamah ka pum hmawm zo tawh a. A piah deuhah chuan workshop, hul ṭha pangngai tak tur hi chu a awm a. Chutiang ruah sur tamah chuan mit khap kar lekah pawh kan huh tur ang chu kan huh zo hman dawn tho bawk si a. Ka tawmnaa ka tawm reng chuan ka taksain vawt a ti telh telh a, ka pum huh zo tho dawn niin a lang bawk si.

Ruah do law law-a in thlen vat a, inthuam lum chu ka thlang ta zâwk a. Ka tlan chhuak ta a. A tirah mit kham thip deuh ṭhat chu awm mah se, kawi sawm vel hnuah chuan a reh a, a nuam ka ti ta phian a.

Kalkawnga tui tling tamna laiah chuan chak deuhin ka khalh a, a insil fai nghal a ni mai a 😃

Tichuan in ka thlen velah ka inthlâk a, ke lawnga ka kal laiin a lo nal deuh bawk nen, ngum sawh dawtin chhuatah ka tlu sawp nawk mai a. Ka tlûk ang anga ka han awm vang vang hnuah ka han che chhuak a, ka nupuiin min lo ngaihven bawk a.

Tunah chuan Khampat Media min sponsor-na executive chair-a ṭhu chungin i thu chhiar lai hi ka type ta a ni. Ka ngum chu a na veng veng mai... kâwng lam mah a ni zawk e!

Homoeopathic damdawi, Arnica 30 ka'n ei ang e!