Remchang tak maiin Mizoram House, Kolkata-ah ka chawl a. A building chu a pawna tang chuan a nalh khawp mai a. Dormitory-ah ka thleng a. Room 10 a ni a. Khum 14 a awm a. Summer vanglai a ni a, fan mamawhna a zual hle. Celing fan hi 2 a awm a. Tin, floor fan 1 a awm bawk a, a vir kual thei lo leh nghal a. Celing fan hi khum 4 chiahin an chhawr bawk a.

Khum chawng 5, khum 10 tihna a nih chu, fan themlem deuh inchuh chuan kan kuai her chhen ringawt mai a ni.

Bathroom lah hi maksak khawp a. A kawngka hi chhunglam atangin a kalhna emaw a vawnban emaw engmah a awm lo a. A mam thla purh mai a. Hetiang ve tur renga an siam a an ai mahin thil kilh bei engemaw chu lo awm ve tawh, mahse a kilhna perek chawpa phawi tawh a ang zawk mah a.

Shower ka han en a, tui-ek bal khawn karah a lo kaw deuh rul a, inbual hma hian kan fai zawk ang em aw, tih rum rum mai a awl. Ka han herh a, a lo khawh thla tuar tuar mai a. A thip thuai thuai mai a. A dangdai ve reng reng!