Featured Post

Google Photos upload tawh sa compress dan

Google leh a product ngaisang leh hmang nasa em em mai ka ni a. Ka Android phone contact zawng zawngte leh thlalak (Photos & Videos) zawng zawng pawh Google Contacts leh Photos app hmangin Google server-ah ka dah vek mai ṭhin a. Phone tihchhiat palh leh thlak chang pawhin contact bo leh thalak bo hi ka nei ngai lo.

Chuti taka ka hman ṭangkai viau lai chuan thawkkhat lai aṭang khan ka Google Drive chu a full titih ta reng mai a. Thlalak leh video ka upload ho chu han paih ṭhen mai tur ka hre ta lo a, hun ka neih loh deuh avangin thla hnih chhung phei chu Google Drive space ka lei belh lailawk a. Chumi chhung chuan engtin tin emaw ka inthian fai a, 15GB limit thleng lo tawk chuan ka dah thei a. Thlalak pawimawh vak lo leh kan hmeh nawn ho te ka paih a, ka lan ve lohna te phei chu ṭhiante ka thawn chhawng nasa hle a ni.

Mahse, thla hnih thum a lo vei a, a hma ang bawk chuan ka Google Drive chu a lo khat chho leh dawn ta mai. Theihtawp chhuaha file pawimawh lo ho ka paih ṭhen hnu pawhin a ngaihna a awm ta ngang lo! Hetia file pawimawh vak lo (nia ka hriat) ka paihna lamah hian file pawimawh tak tak pawh ka paih phah nual a ni.

Kawng hnih zawk ngai a awm ta - pakhatna chu a hma ang bawka space lei belh a, thla tin ₹130 chuang chawi a ni a, chu chu thla tina ka sum lak luh aṭanga teh chuan a sang deuh mah mah ka ti si a. Pahnihnaah chuan Google account dang siam emaw, Yahoo! Flickr account hman a ni. Hetia ngaihtuahna nasa deuha ka sen lai hian rilru chhungrilah chuan Google hian Photos ho hi compress phal se la aw tih chu a lo lang ve leh ṭhin a, mahse an ni tan pawh an sum hmuhna kha a ni ve tho mai si a, an phal em dawn emaw ni le, tiin ka ngaihtuahna kal lai chu ka titawp daih zel a! Gmail han hawng i la a chungah hetiang hian notification a lo lang kuau zel mai bawk si!

You’re running low on storage space. Try freeing up space or purchasing additional storage.


Vawiin chu ka thlalak paih ṭhen tur ka han enkual leh vel mai mai a, pakhat chauh hi paih tur ka hmu a, han tih leh chuan vak ngaihna hre ta lo chuan Google Photos settings ka han hawng a. Chutah chuan RECOVER STORAGE tih hi a lo awm a, ka han hawng chu ka beisei ngam reng reng loh mai chu ka hmu ta a!

Original size atanga high quality (16MP)-ah a compress theih

Google Photos-ah hian thlalak leh video backup dan hi chi hnih a awm a - pakhat chu original size anga backup-na a ni a, chu chuan Google Drive space kha a ei tel a, chu chu Google Drive space tikhattu ber chu a ni a. Ka paih fe hnuin thlalak hian 11GB chuang a la awh a. Email attachments leh file pawimawh dang Drive lamah dahṭhat a tibuaithlak vek mai a. Pakhat dang leh chu High Quality-in a backup leh theih a. Thlalak lian ho chu a nihna ang anga dah loin a lo tite tihna ni. In zawhna neih ve ngei tura ka ngaih chu engtiang chiahin nge a tihtet a, lak let leh dawnin a quality a chhe vek ang em, tih hi a ni ve thoin ka ring. High quality tih hi tunah chuan 16MP a ni a (technology lamin hma a sawn rualin a lian chho ve zel a, hmanah chuan 1200px velah a compress ṭhin a). I phone camera kha 13MP te emaw a nih chuan engmah a compress dawn lo tihna a ni, original ang tho kha a store ang.

Tichuan, thlalak upload tawh sa compress lam chu han sawi chhunzawm zel i la. Thlalak hi a tam tham tawh chuan a compress chhung hi darkar chuang fe a ngai ve a. Compress lai hian thlamuang takin awm mai tur a ni.


Comments

Buy Online! Home Delivery!!

Popular Post

Mizo Doctor hmasa - Hmunṭha khaw lal daktawr

MLA LAD Fund hman theihna leh hman theih lohnate

Windows leh Android-ah Mizo Ṭawng dik takin i chhu tawh ang u

Sailam Lal Bengkhuaia Pasalṭha Chawma, James Winchester thata a fanu Mary Winchester sala mantu - Chungtea

Mizoram Sana - The Mizo Meridian