Walkie Talkie (WT) hi Serchhip leh a chhehvelah hmuh tur a tam ta hle mai a. Kohhran inkhawmpui leh tihpui nikhuaah te, khawtlang ni pawimawh hmanna leh thil pawimawha hman mai bâkah ṭhianho zinnaa han ken mai atan te hmanraw pawimawh tak a ni chho mek a ni. Walkie talkie te hi phone ang lo takin rang takin a inbiak theih a, thil a sawiho zung zung theih a, hmun hla deuha kala phone signal awm lohna hmunah te a ṭangkai em em a ni.
Kan khua leh a chhehvelah hian kan hman lar em em model pahnih chu Baofeng company siam ve ve - BF-888S leh UV-5R te hi a ni a. Hemi model pahnih hi a man a tlawmin, leklam a awlsam a, a battery te a daih rei bawk avang hian hman a hlawh em em a ni. Amaherawhchu, hetiang walkie talkie leitute leh hmangtute hian dan an lo bawhchhe thei reng a ni tih hi an inhre reng reng lo awm e.
Walkie Talkie lama India dan chu
India ramah hian radio signal (airwaves) te hi sawrkar hian khawng takin,
Wireless Planning & Coordination (WPC) hnuaiah, a khuahkhirh tlat a.
Radio (walkie talkie) eng pawh i duh duh i leiin, ṭawngna atan i
hmang nghâl ngawt thiang lo a ni. A bîk takin ramdang nena inrina
(international boundary) hrulah phei chuan sawrkar hi a khirhin dan
bawhchhiatna pawi tak a thleng thei.
Walkie Talkie chi khat mipui nawlpuiin licence ngai loa an hman theih
chu a awm a. Chutiang radio te chu "Licence-Free Radio/Walkie Talkie" an ti a. Dan ang chuan licence ngai lo radio te hian radio signal
(frequency) hman tur bik - PMR466 an tih - a neih bakah hian
thuthawnna chakna (power) tlem te, 0.5 Watt aia chak lo a hmang tur a ni a,
a antenna hi herh thlawn theih loh a ni bawk tur a ni. PMR466 huang chhungah
hian channel 16 a awm a, chumi erawh chu mi tupawhin an hman phalsak
kan ni. PMR466 radio te hi thuthawnna tan leh dawnna tan a hman tlak viau a,
tlang pang deuha awm pawhin boruak mel 2-3km danah pawh fiah takin a inbiak
theih a ni.
(Article dangah radio zungzam/wave te hi engtiangin nge a ṭai darh tih
kan la ziak ang).
Baofeng Radio te nihna dik tak
He lai hi dan bawhchhiatna bul inṭanna lai chu a ni!
Baofeng UV-5R hi radio chak tak mai a ni a. Boruaka radio signal
dangtu (tlang, inchhawng sang, thing chang hmun, etc.) a awm loh phei
chuan km 25 thleng te pawhin a inbiak theih a ni. A thuthawnna chakna hi
4-5 Watt lai a ni a - licence ngai lo chi aiin a lêt sawm laiin a chak
zâwk tihna a nih chu! Tin, sawrkar leh emergency radio signal/frequency
man turin a herh mil theih bawk a, signal a lo tibuaiin a ti-jam thei a
ni. Hetiang a nih avang hian sawrkar hmalakna huang pawnah chuan khauh
taka khuahkhirh a ni a. Hetiang radio hmang thei tur hi chuan sawrkarin
exam a buatsaih, Amateur Station Operator Certificate (ASOC) exam pass
hnuah Amateur Radio Licence hi dil leh theih chauh a ni.
Chutiang bawkin, Baofeng BF-888S te hian a tlangpuiin thuthawnna
chakna hi 2-3 Watt vel an nei a. Hetiang walkie talkie te hi a
pawi lehzualna chu a thar tirha a frequency awm sa hi sawrkar hman tura
tih frequency vek a la ni zui bawk a. Phalna nei loa hetiang frequency
hman hi dan bawhchhiatna lian tak a ni.
Dan bawhchhiatna kaihhnawih
Licence nei loa thuthawnna chak tak nei radio ni bawk hman hi dan
bawhchhiatna ho te a ni miah lo a. Thuneitute'n hetiang frequency phal
loha thu i thawn tih an hriata an man che chuan i radio kha an mansak thei
che a, pawisa tam tak i chawi thei bawk. A bikin venhimna lam thawktu
(sipai/police) te, airlines te hman tur bik frequency hman phei chu jail
tan theihna a ni bawk. Tin, sumdawng, dan phal loha lo zuartute pawh an
man fo bawk.
Engtin nge him takin dan angin kan hman ang?
In kohhranin emaw, khawtlangin emaw, zin khawthawnnaa walkie talkie i
mamawh viau a nih chuan duhthlan tur pahnih i nei:
Pakhatnaah chuan, "Licence-Free PMR466" radio te i lei thei a.
Thuthawnna turin 0.5 Watt chakna a nei ang a, a antenna herh thlawn theih
loh a ni bawk tur a ni. Hetiang walkie talkie te hi a thar hlimah khawih
danglam ngai loin a hman nghal theih a ni. E.g., Baofeng
BF-22C, Kenwood TK-3501/ PKT-23, Vertel Team Talky, etc.
Pahnihnaah chuan, hmun hla tak biakna atan thuthawnna chak tak nei
chi - Baofeng UV-5R, Kenwood TK-2000, etc., te i mamawh a nih chuan
tlem i inzir belh leh hlek ang a, exam te i pass ang a, amateur radio
licence te i neih a ngai thung a ni. (Restricted Licence Syllabus).
Walkie Talkie hi kan khawtlang tan hian hmanraw pawimawh tak mai a ni
tih kan hre tawh a, chutih laiin a hman kawngah kan fimkhur a, mi dang tibuai lo leh dan
ang taka kan khawtlanga radio signal te him taka a awm theihna'n
walkie talkie hmangtute'n mawhphurhna sang tak kan nei a ni.