India Rama License Ngai Lo Walkie-Talkie Hman Dan Kimchang (PMR446)

Inkhâwmpui leh thil tihpui (hospitality event) lian tham i buaipui emaw, insakna leh hna lian tham thawhna hmunah i thawk emaw, ṭhianzohoin ramhnuaiah in kal emaw pawh nise, inbiakpawh zung zungna'n walkie-talkie tluk hi a lo awm lo. Mahse, walkie talkie i lei hmain India ram dan i hriat a ngai.

India ramah hian walkie-talkie hmang turin commercial licence emaw, amateur radio license emaw neih kher a lo ngai lo — a dik chi i lei phawt chuan. India rama license ngai lo chi walkie talkie te hi PMR446 (Personal Mobile Radio 446 MHz Band) tih a ni.

Heng hi dan anga hman dan tur, frequency thlan dan tur leh phalna nei loa hman khap (licenced) walkie talkie lei palh laka fihlimna'n i hriat ngai te chu an ni:

Dan Anga PMR446 Hman Dan Tur Dan Pawimawh 3

License ngai lo chi radio (walkie talkie) hmang tur chuan i device-in heng thil pathum hi a zawm ngei tur a ni:

1. WPC Certification: I radio chuan India's Wireless Planning and Coordination Wing (WPC) atangin Equipment Type Approval (ETA) a nei tur a ni.
2. Fixed Antenna: A antenna chu phawi theih emaw, thlak theih (upgrade) emaw a ni tur a ni lo.
3. Power Limits: Radio power (signal a thehchhuah theih chin) chu 0.5W (500 mW) aia sang a ni tur a ni lo.

Fimkhur tur: Online aṭanga radio man tlawm leh power sang (2W, 4W, emaw 5W Baofeng siam ho) emaw, US aṭanga FRS/GMRS walkie-talkie emaw chah luh hi a hluar hle. Hengte hi commercial licence emaw, amateur license emaw bik neih loh chuan India ramah hman a khap tlat a ni a. 0.5W limit leh WPC approval a nei em tih endik ziah rawh.

Analogue Frequencies: Channel 16-te

Standard analogue PMR446 radio-te hi 446.0 leh 446.2 MHz inkar band-ah hman phal a ni a, 12.5 kHz channel spacing hmangin channel duan sa 16-ah ṭhen an ni. Wlakie Talkie thar i lei chuan heng channel 16-te hi a lo in-programme sa ang:

Channel	Frequency (MHz)		Channel	Frequency (MHz)
1	446.00625		9	446.10625
2	446.01875		10	446.11875
3	446.03125		11	446.13125
4	446.04375		12	446.14375
5	446.05625		13	446.15625
6	446.06875		14	446.16875
7	446.08125		15	446.18125
8	446.09375		16	446.19375

Hriattur: Kum 2018 hmaa siam radio hlui i neih chuan Channel 1 atanga 8 thleng chauh a awm tlangpui. Radio thar leh hlui hman kawp i tum chuan hei hi hre reng ang che!

Digital (dPMR) Hman Dan

Hla deuhah pawh aw fiah zâwk i duh chuan Digital PMR446 (dPMR) hi i mamawh ang.

Digital device-te pawh hi 446.000 - 446.200 MHz frequency band-ah tho hman theih a ni a, mahse channel spacing an hman (6.25 kHz) hi a zim zâwk avangin analogue-in channel 16 a hman lenna hmunah hian digital channel 32 lai a leng a ni.

Privacy Codes Chungchang

Online dawra PMR446 radio i zawnin CTCSS emaw, DCS emaw te hi "privacy codes" emaw "sub-channels" angin an fak uar hle ṭhin.

CTC/DCS te nihna dik tak hi hriat a ṭha. Heng hian in inbiakna a thup (encrypt) lo. Audio filter ang chauh a ni. Nang leh i thiante Channel 4-ah CTCSS code 12 hmangin awm ta u la, kha code chiah hmanga an rawn biak loh che u chuan in radio a ri ve dawn lo tihna a ni. Mahse, code hmang loa Channel 4 lo ngaithla (scan) tu chuan in thil sawi zawng zawng an hre thei tho. Thu pawimawh lutuk chu sawi loh a him ber!

Khaikhawmna

Thil reng reng hian ṭangkaina a nei a, ṭangkaina a neih ang te ṭha thei ang bera hmang tur chuan ka thil hman ṭangkai tak hian mi dangte engtin nge a nghawng, chumi chu midangte pawhin ṭangkai tak leh awmze nei taka an hman ve theihna atan kan ram danin engtin nge a phuar tih te kan ngaihtuah a ngai khawp mai. Ka tana ṭangkai tak hi mi dangte tan engtin nge a ṭangkai ve theih ang, tih rilru kan pu tlat dawn nia.

Engemaw hriat chian duh emaw, a lei theihna tur emaw i duh chuan comment lamah te hian sawiho theih a ni e.

Hriatna tihzautu atan: Khampat Ham-Radio Hub hi lo tlawh ve la aw - hamradio.khampat.com