3-3-3 Radio Emergency Survival Plan

Tun hnai mai aṭang khan handheld transceiver radio (walkie talkie kan tih mai) hi kan hmang nual tawh a. Tun hnaia kan hmanna tam ber chu COVID-19 duty te hman hi a niawm e. Inkhawmpui nikhuain kan hmang nasa a, kumin kum tir lama KṬP General Conference kha ṭum khata Walkie Talkie hman tamna ber record a la ni hial awm mang e. Walkie Talkie 50-70 vel bawr a ruala hman ang vel niin a chhut theih ang. Aizawl Traffic Police ho hian an hmang nasa em em bawk a, mahse anni chu Sawrkar lam a nia, PHE te nen sawi kai lo mai i la.

Ṭum khata hman chauh ni lo, ni tina kan hnathawhnaa hmang pawh kan ṭhahnem chho zel a. A tam berina kan hman channel 16 awm chi (Baofeng, etc.) te, channel 128 awm chi te hi a man a to loh avangin neih pawh a awlsam hle. He'ng kan radio hum fir fer te hi chhiatrupna a lo thlen chang atan pawh ṭangkai takin a hman theih a. Khuarel chhiatna nasa tak a lo thlen changa inbiakpawhna kan hman tlanglawn - phone call/sms leh internet service a chhiat hunah pawh he'ng Transceiver Radio te hi chu battery kan neih chhung chu a hman zel theih a ni.

Chhiatrupna!

Entirnaa tan, Lirnghing nasa tak leh rapthlak tak a lo thleng ta a. Power supply te lo khaihlakin, mobile tower te lo tluin emaw, lo hman theih loh hun te lo thleng se la. Chutiang hunah chuan kan radio chu a la nung dawn a ni. Transceiver kan kawl chuan kan kutah khan Radio Station kan kawl tihna a ni dawn a. Khami kha ṭangkai takin a hman theih a, kan awmna hmun a zirin km 3-7 biala mi dang hmang ve an awm chuan kan inbe pawp thei ang a, chu chuan chhanchhuahna hna awlsam takin min thawhtir thei dawn a ni.

Engtin nge niang?

Chhiatrupna a lo thleng ta a, inbiakpawhna dang zawng zawng a hman tlak loh tih i hria a, chutah chuan chhanchhuaktu lam engtikah nge an lo thlen dawn i hre ta lo a. Hun i hman thiam a ngai ta hle dawn a ni, a chhan chu i radio battery a lo low hman vaih chuan beisei a bo hle ang.

I radio battery chu ren taka i hman a ngai ta a. Khawvel pum huapa inang tlanga kan hman theih turin chhiatrupna a lo thlenin kan radio chu, eng radio pawh hmang i la, Channel No. 3-ah dah phawt tur a ni. Battery ren a ngaih avangin on reng a rem dawn lo a. Chuvangin, radio on hunbi inang tlang kan siam leh a - darkar 3 dan zelah - zanlai (0000hr), zing (0600hr), 0900hr, 1200hr, 1500hr, 1800hr, 2100hr zelin. Chuan hetia kan radio kan on hian minute 3 zel on bawk tur a ni.

Channel No. 3-ah darkar 3 dan zelah minute 3 zel radio tihnun tur

Hetianga tih hian chhiatrupna lo thlen leh ramhnuaia bo changin nunna tam tak kan chhanhim thei a ni. Darkar 3 chhung hian radio man phak tawk - km 5-7 vel kan lo kal hman zel bawk a, inzawn dawn pawhin a him hle a ni.

Tunlaiin lirnghing thuthang kan hriat leh ramhnuaia mibo zawn chang tein radio kan hum ta fur a, hetiang nikhua hian khawvel puma an inhman ṭawm mek ang hian tih ve tum i la, kan radio te kan hmang ṭangkai lehzual dawn a ni.

Remchangah radio chungchang ziah zel kan tum ang. Ziah tur tam tak a awm a ni.