Minimum balance ngaih lohna SBI Basic Savings Account

Tunlai chu Bank lam chungchang chanchinthar chu State Bank of India (SBI)-in minimum balance a awm loha customer te pawisa an chawitir thin chungchang hian a luah khat hle mai a. Hetianga pawisa an chawitir tlingkhawm pawh vaibelchhe sang khat chuang teh meuh a tling a ni. Mipui lam atangin nawrna a nasat avangin average minimum monthly balance pawh tihhniam emaw, quarterly average balance anga kalpui emaw an tum nia sawi te pawh a awm a. Engpawhnise, minimum balance awm loh avanga customer-te pawisa chawi tur erawh an tibo mai dawn lo niin a lang.

SBI hian Bank Account hawn theih chi hrang hrang an nei a, a vaiin kan sawi lo ang a, tun tumah chuan Basic Savings Bank Deposit Account chungchang hi kan ziak dawn a ni.

He basic savings account hi mi tupawhin, KYC documents a neih kim chuan a hawn phal vek a ni a. Chutih laiin a tum ber chu mi rethei zawkte leh sum lakluh tlem zawkte tan, bank charge leh fee neuh neuh awm lo tura duan a ni.

He account hi mimal emaw, joint emaw-in a hawn theih a, khawi branch-ah pawh a hawn theih vek a, interest rate pawh Savings Account rate pangngai nen a inang a, pawisa dahluh theih zat pawh bituk a awm chuang lo a ni.

Kawng tam zawkah Savings Bank account nen a inang vek a, chutih laiin a chunga kan tarlan tawh ang khian mi harsa zawkte puala siam a nih angin Savings Account pangngai nena danglamna tlem tlem a awm a. Hetiang hian -

1. Minimum Balance: Basic Savings Account-ah hian minimum balance bituk a awm lo a, zero balance pawhin a dah theih a, chutih laiin Account khawih chet loh chu hman theih lohin a lo awm mai (dormant) thin tih erawh hria i la. Chutih laiin account nung lo tihnun lehna atan chawi a awm lo bawk. Account close dawn pawhin chawi a awm lo a ni.
2. Withdrawal: Account atangin pawisa hi Withdrawal Form leh ATM Card hmangin a lakchhuah theih a ni.
3. Basic RuPay ATM Card: Basic Savings Account hawn hian Basic RuPay ATM Card a chhawm tel nghal a, he card hi a thlawna pek a ni a, maintenance charge pawh a awm lo a ni. He card hi ATM atanga pawisa lakchhuahna atan a hman theih ang a, POS leh Online shopping atan a hman theih ang em tih kan chiang lo.
4. Savings Account pangngai nen neih kawp theih a ni lo a, Basic Savings account hi pakhat chiah neih theih a ni a, Branch dangah pawh i nei thei chuang lo. Basic Savings account i hawn laiin Savings Account pangngai i lo neih sa pawhin ni 30 chhungin an close ang.
5. Transaction limit hi a awm thung a, thla khatah vawi 4 chiah pawisa a lakchhuah theih a ni.

Kan chhehvelah Bank Account neih ve ngei ngei ngai si, mahse Minimum Balance awm a ngaih vanga nei ve thei lo an awm thin a. Chutiang mite chu i lo hriattir theihna atan kan rawn chhawpchhuak a ni.

Heta kan thuziak hi SBI website atanga kan lakchhawn a ni a. Basic Savings Bank Account hawng turte chuan an hawnna tur Branch-ah zawhchian hmasak tur a ni.