Mi nawlpuiin email service kan hman tam ber chu Google Mail service, Gmail hi a niawm e. Email hman ngaihna thil engkim atan kan hmang a tih theih awm e. Android phone te nen thlunzawmin, phone bo zawnna thlengin he Gmail hi a ṭangkai em em a ni. Chuti khawpa thil ṭangkai chu miin an lo tihbuaisak thei che (em?)! I Google account a him nge him lo tih en dan kan sawi ang.

A hmasa berah chuan, i password a him em? Password siam dan chungchangah hian fimkhur a ngai khawp mai a. A har thei ang bera siam tur a ni. Thumal awmsa emaw, number indawt chho te, pian ni, anniversary, phone number tih vel hi a hlanga hman loh tur a ni. Alphabet leh number chawhpawlh bakah symbol/special character hman ṭhin tur a ni. Entirna lar berah chuan P@ssw0rd tih hi a ni a. Han en vang vang i la, a inchawhpawlh kim hle a ni. Khitiang deuh khian thumal, number leh symbol inpawlh hman tur lo ngaihtuah ve rawh. Mahse, har leh lutuk, nangmah pawhin i hriatreng theih loh kha chu hman kher a ṭul lo.

A dawt lehah chuan Google hian mail service bakah service dang a nei ṭeuh a. Chumi zingah chuan service dang nena Google Account thlunzawmna te, Google account kha eng device aṭanga sign-in nge tih chhinchhiahna te a awm bawk a ni. A hnuaia mite hi i inzawt ngai em?

1. I hriatthiam miah lohin 3rd party app nen i lo thlunzawm reng em?
2. Miin i password hria emaw, ring dikin device dangin an lo login reng em?
3. I Google account-ah security breach a lo awm em?