Ramhuai ûm bo a ni em? - Mary Winchester Zoluti

Mizorama Kristianna a luh hma kha chuan ramhuai kan be ṭhin, thing bul lung bul bia kan ni tih vel hi ziak leh sawi hriat tur a tam fu mai. Chutih laiin ramhuai bia kan ni lo, kan tlawn zâwk, thing bul lung bul kan be lo tih thawm pawh a zawi chuang lo. Zawlnei nia sawi ṭhin Darphawka inlarna hmuh an tih (1882-1890) zinga a tupa Lalmawia'n mi sawi chhawn a lakkhawm zinga pakhat chu, "Ramhuaite pawh in la ngam ang," tih hi a ni a. He thu avang hian pi pu sakhua kha ramhuai bia anga ngaihna leh kristianity chu a rawn tibotu, a ngamna niin sawi a ni a. Kum 1945 khan Rev. Zairema chuan a B.D. Thesis-ah, "Religion of Lushai," tih hmangin doctorate degree a lo hlawh chhuak tawh a. Chuta a note leh a thesis chu a kang a, Serampore lamin a copy an lo neih tawh bawk si loh avangin, chumi zula a ziah, "Pipute biak hi" tih chu Revd. Chuauṭhuama edit-in kum 2009 khan tihchhuah a ni a. Rev. Zairema hi mi thiam kan neih zinga pi pu sakhua zir bingtu hmasa ber a ni nghe nghe.

He a lehkhabuah hian HUAI hrang hrang a rawn ṭhen fel hle a. Thlarau khawvel leh hring khawvel pawh ṭhen felin chuta mihringte tana ṭha leh ṭha lote pawh a hrilh fiah ṭha hle. Thlarau chimawm lam a sawiah HUAI tih chu mihring thuhnuaia awm lo an nih thu leh an awmna hmun azir zela koh an nih thu a ziak a: tlanga cheng chu tlang huai, siha cheng chu sih huai, bunga awm chu bung huai: chutiang zelin tui huai, kham huai, pûk huai tih an ni a, ramhnuaia cheng ṭhin pawh RAMHUAI an ni tiin, a tam ber pawh an ni awm e a ti nghe nghe. Tunlai ṭawnga RAMHUAI ZAWL kan tih pawh hi Bible ṭawng a ni a ti.

Tunlaiah chuan pi pu huna HUAI tihin a khaikhawm kha Ramhuai tiin kan khaikhawmtir ta a; hei hi Mizo ṭawng Bible ṭawngkam ngei a ni a; he thil avanga HUAI chungchang thua kan vaih tâkna pawh hi Bible lehlin dan vanga thil rawn inher danglam chho a ni tih hai rual a ni lo. Bible-ah chuan mihring kawchhungah ramhuai a lût ṭhin a; pi pu hunah chuan chutiang a thlen àwm hriat a ni ve lo. Mihring ti natu nia an hriatte chu Phûng te a ni a, in thum kar thei chi chu Phungpui kan ti deuh. Chhura chanchina Phungpuinu erawh kha chu Paite a nih hmel thung. Hei hian entir ril tak a nei ni pawhin a lang.  Chawm hi mihring dawlh thei a nih hmel bawk a, Chawmnu hmuh chu thihnaah an ngai bawk. Ṭau hi mi ti na thei niin ngai mah se; chutiang fak sawi tur erawh a vang hle. Maimi pawh hi mi zial ṭhin a ni a, tun hun thlengin kan la sawiin kan la hria a ni. Tulum hi mihring kawchhunga lut ṭhin a ni a, mitthi tawh taksaah te pawh a lutin mi nung angin a chettir thei a; amah tulum chu sual hran lo mah se an ṭih hle a ni. (Thubelh: Zombie te nen a inpawl viai mai - LP). Hringei te pawh kan rap hle a, Khawhring te hi mihring kawchhunga luta pum tinatu, itsikna hri chhe vei a ni. Khawmú te chuan mi a la bo daih ṭhin a, chutianga ngaih chu tun thleng hian sawi tur a la awm. Hmuithla pawh hi an hlau hle a, mihringa awm (rau/nunna) nia sawi a ni. Heng bakah hian Dengsur, Tualsumsu, Zunhindawt tih te mihring tana hlauhawm an awm bawk.

Mizo Kristiante sawi uar tak pakhat chu, Darphawka Inlarna an tih mai, ramhuaite pawh in la ngam ang tih hi a ni a. Kristianna a lo thlen khan ramhuaite pawhin Isua chanchin an hriatin hlauin an pem nguah nguah ni awm a ni. Ramhuai pem hmu thei te pawh awm hialin hmun hrang hrangah RAMHUAI LIAM KAWN te pawh a awm a ni. Pi pute khan ramhuai hi an lo ngam lo reng em tih hi chhui nawn ngai tak a ni a. Vawrsela Pa chu ramhuai satliah ni lo; ramhuai lal meuh pawhin a ngam loh thu kan hmu a. Tin, pi pute'n ramhuai chenna ngawpui an vah darh ṭuma kangvara thlam sak zawha lo thiang an hman thu pawh kan hria a ni. Ramhuai awmna an vah darh ṭuma ramhuai thinrimin an mumanga a inlar thu te kan hre ṭhin a; mihring kawchhunga a luh thu erawh kan hre ngai lo. Mihring tinatu hrang hrangte hi pasalṭha leh patling te chuan hnám vilik zuai zuai paha an vau zam ṭhin thu te kan hria a; kristian hnûah pawh, "Hnám ka len nuam mang e, hmuh theih se doral angin...," tih hla te pawh Laithangpuia te'n an la phuah nghe nghe kha.

Zawlnei Darphawka Hriatrengna Lungdawh

Rokunga chuan, "Chanchin ṭhain kan ramah ramhuai a um bo ta," tiin hla a phuah a, chu chu kan sak tui pawl tak pawh a ni nghe nghe. Mahse, Bible ṭawngkam a nih mathlawn loh angin, pi pu huna kawchhunga ramhuai a luh thu kan hriat ngai loh laiin Kristiannaah chuan Bible aṭang rengin kawchhunga ramhuai lut kan nei ṭan ta a. Chuvang chu ni maw, kristian kum 100 tlin lawmna neih hnûah meuh pawh RAMHUAI HNAWH CHHUAH tur kan la nei zut a; mi nazawng ngam loh, mi naran hnawh chhuah theih loh ramhuai chu, mi bîk leh tu emaw rau chang chhah deuh nia langte ngam theih chauh a la ni fan. Khaw pakhatah phei chuan hmeichhe pakhat kawchhungah ramhuai a lut niin an ngai a; "Ka duh tawh lo, khawngaihin tawp tawh rawh u," a tih lawm lawmna aw ri chu beng chhut ngawnsanin an chil hlum tak hial kha! HUAI hi huai hrang hrang khaikhawmtu a nih zawk thu kan sawi tâk ang khian — tun hnûah erawh Bible ṭawngkam avangin ramhuai tih chu ramhnuaia cheng chi chauh sawina'na hmang tawh loin huai zawng zawng leh mihring tina thei thlarau chimawm, a ṭha lo lam chi zawng zawng sawina'n lo hmang tawh thung pawh lo ni ta i la; kawchhunga lut hial la nei reng, chhungkua leh khawtlang, kohhran la tibuai rengtu hi kan pi pute ai mah khan kan ngam lo ta zâwk em ni ang, tih mai hi awl tak a ni. Pi pute'n rau khawvel leh hring khawvel an ṭhen hran thiam ang pawh ṭhen hrang thiam tawh lo zâwkin a mual boin kan bo phuk phuk zawk niin a ngaih theih hial zâwk a ni.