Featured Post

Chawngpuii Nu Lunglen Tlang, Serchhip

CHAWNGPUII NGE A NU?

- Lalmuana

A hmasain Chawngpuii pian leh murna chu Parvatui a ni a, a pa chu Suakpuilala a ni a, a nu erawh chu a hming tak ka hret hei ta lo a ni.

Chawngpuii hi nula hmelṭha tak an unau zingah pawh hmelṭha lawr lak a ni a, a hmelṭhat em avang hian Zoram pawh a deng chhuak hial a ni. A hmelṭhatzia chu Sangvunga fapa, Lalkanglova, Tuifim lal chuan a lo hriatin amah hmu tur leh neih tumin Parvatui lam pan chuan a kal ta a. An in a zuk thlen chuan Chawngpuii chuan Vawk chaw chhum pah hian la a lo hlum a. Lalkanglova a hmuh chuan, "lo leng rawh enge i tih dawn" a lo ti a. Lalkanglova chuan, "In khua hi a va hla ve" a ti a. Chawngpuii chuan nui sang chung hian, "Kan khua aṭang chuan a hla lo a sin" a ti a. Rei fe an inkawm hnu chuan Lalkanglova chuan neih tumin a nu leh pa te dil turin palai a tir ta a. Mahse, inneih chu an puitlin mai thei lo va. Lalkanglova chu khaw lampanin a haw leh ta a, a hnuah a zuk kal nawn leh a, palai tir nawn lehin an khawkar a hlat avanga thu titlu fel turin a chah a, thu chu an rawn ti fel thei ta a, tichuan an innei ta a ni.

Kum khat vel an inneih hnuah chuan Chawngpuii chuan nau a lo pai ta a, chumi lai chuan Lalkanglova chuan khuangchawi a tum a, chumi hma chuan mitthi rawp lam an nei a. Hmanlai chuan mitthi rawp lamah hian hmeichhia an tel ngai lo va. Mahse, a nupui chu a chhuan em avangin mipui mit hmuha hruai chhuah vel a chak tlat mai a, a hruai chhuak ta nge nge a. Nakinah chuan Chawngpuii chuan nau chu a nei ta a, nau a'n hring chiah chu a muhil chawrh chawrh mai a, harhchhuak tawh loin a muhil hlen ta nghal a ni. Tin, a fanu hmingah hian Saikhaii sak a ni. Chawngpuii ruang chu kuangin an ur ta a, a pasal Lalkanglova lungleng lutuk mangang chuan Hreipui la in an urna kuang te chu chehchhiat a tum a, Upa ho chuan awih loin an lo dawm bet a, a chek chhe ta lo hram a ni. Tichuan, nikhua a lo rei a, an kuang ur pawh chu a ruhrel a lo ro vek tawh a, an la chhuak a puan thulkhungin an tuam a, an thul khung tlat a.

Chawngpuii thih thu hi a kar a hlat em avangin a nu leh pa te chuan an hre mai lo va. An hriat meuh chuan nikhua a lo rei fe tawh a. Chawngpuii nuin a fanu boral thu a hriat chuan a tuar na em em mai a. A fate zinga hmelṭha ber a nih avangin a ruhro tal chu ka bulah awm rawh se, a ti a. A ruhro la tur chuan kal a tum ta a, chutia Lalnu amaha kal tur chu ngai ngam lovin Upate leh laina ṭhenkhat te'n an zui ta a. Tichuan, an han kal a, Lalkanglova khua Tuifim chu fehreh san laiin an han thleng a, a ruhro an thulkhung pawh chu chuh buaitu awm lo chuan an la a, an hawn ta a.

Hetih hun lai hian an kalkawng chu lamlian awm hma a nih avangin an haw lam pawh hi a hmaa an rawn kalna ngaiah bawk an haw leh ta a. Serchhipah chawl muang ta lo chuan hmanhmawh takin an kal zel a. Upate sawi danin, tuna Chawngpuii Nu Lunglen Tlang an tih an thlen khian Chawngpuii nu chuan a kal pel mai thei ta lo va. A tlang chhipah chuang chhuakin an hnung lam, Tuifim tlang, Chawngpuii boralna chu a han thlir let a, a ṭap bang thei ta lo va. Upate chuan Ka pi duh tawk tawh rawh, kan kalna tur a la hla si an ti a, an hruai thla a, an kalpui lui ta a ni.

Hei hi Chawngpuii Nu Lunglen Tlang tih hming a lo put chhuah dan a ni. Chawngpuii lunglen tlang ni lovin Chawngpuii Nu Lunglen Tlang tih tur a ni e.

(He article hi ni 21.2.2010 (Sunday) Kawlri chanchinbuah chhuah a ni tawh. A ziaktu Lalmuana hi a dam lai chuan Serchhip history chhuinaa mite biak rawn ber ṭhin a ni).

Comments

Popular Post

Changpat leiṭha (Vermiform compost)

Google Photos upload tawh sa compress dan

Kaikuang chi hnih - shrimp leh prawn

Windows leh Android-ah Mizo Ṭawng dik takin i chhu tawh ang u

MLA LAD Fund hman theihna leh hman theih lohnate