Featured Post

Love Song ngaihthlak hi...

 

Love Song ngaithla ngai miah lo i ni em? Love Song ngaithla ngai miah lo hi chu mi tlem te an ni ang. Kei chu ngaithla ve nasa tak mai ṭhin ka ni a. Mahse, nu leh pate hian ngaihthlak vak an phal loh avangin in chhungah chuan kan play khat khawp mai, khat han ti i la, kan play ngai lo te pawh a tih theih ang. Mahse, Cable TV lo lar tak a, hla thlan channel a awm tak hnu khan han hmehchhuah sual palh zeuh kha kan ching ve a.

Kum a lo vei a, love song lam chu sawi loh, hla hrim hrim pawh ka ngaithla khat ta khawp mai. Kum 10 deuhthaw hla ngaithla mumal loa ka awm hnuin tunlai chu ka ngaithla nasa a, khawhar hnemah tiin ka play ngun viau mai a. Mahse, love song chungchanga ka ngaihdan hi a dang ta deuh riau mai a. A chhan ni bera ka hriat chu Pathiana innghah pawimawhzia ka tem ve tak vang pawh a ni ang.

Love song kan han tih bika hi chu sakhua nena inzawmna nei lo, mipa leh hmeichhe inhmangaihna leh induhna hla ho bik ka sawina a ni a. A huang tihzim leh tihzauh thu-ah chuan ramri kham fel thlap tura ngaihdan rualkhai tak a awm theih ka rin loh vangin, sakhuana tel lo hla, mihringin amaha a beihna hla, secular love song hi tuna love song ka han tih bik chu a ni a. Hetiang hla-ah te hian mihring pui laka sual ti tur emaw, rilru sual pu lo tura inzirtirna chu a awm bik kher ngai lo.

Kan sawi tak ang khian kan love song tam tak hian rilru sual pu turin min zirtir kher lo a ni thei e. Mahse, heng hla lung kuai tak tak, rilru zawng zawng senga kan ngaihthlak a, kan sak fo ṭhinte hian mihring mihrinna hmanga kan harsatna tawhte sual chhuak turin min fuih a, mihring chakna hmanga lungleng inhnem tumna, mihring theihna hmanga nupa hlim taka awm dun tura infuihna a ni tlangpui a. Engemaw chenah chuan thil pangngai tak a ni a, 'Pathian chuan mahni inpuite hi a ni a puih ṭhin ni' tia sawi te pawh a awm ve bawk a.

Mihring nunkawng hi a tluang purh anga lang pawh hi kan va hmuh kimpui vek loh vanga tluang purh anga mite hmuha lo lang mai mai hi a ni a. Thil tam tak inkalh chingchivet chuat kara hringnun vui liam ve hram hram tur kan lo ni lek mai a. Harsatna tam tak kan tawh te hi hrechiang loin kan lo tawn mai mai a, a tawpah chuan kan chhe rup ṭhin! Nulat tlangval leh nupa nunah hian love story hi thlana kan invui liam hma loh chuan a tawp thei lo tih zirchhuak hi mi tam an ni lo. Hetiang mihring nunphung kal pangngai tak anga ngaih kan tawn chhoh meknaah hian mihring mihrinnaa innghata mahni theihna ang ang lo sual ve hi a harsa hle mai. Love song leh khawvel thiamna leh tehna hmanga inawih tlei palh hi a hlauhawm em em a, zawh loh phurrit, chhe siam ṭhat hleih theih tawh loh, chapona tlang aṭanga inhnukhniam thei tawh lo, bei nasa ve tawh intih tawkna nunah min thlen fo a, inngaizawng leh nupa tam tak a pawt ṭhen fo a ni.

Long song tam tak chu ngaihthlak pawi lo, inngaizawng leh nupa inkar tinghettu zawk hla a awm nual mai. Love song ngaihthlak a ṭha lo han tih bawl pawh hian mi rilru a tithlep thei a. Chutih laiin love song ngaithla tura han infuih chi phei chu a ni hauh lo. Kan thliar thiam a pawimawh ta ber a ni.

Comments

Popular Post

Changpat leiṭha (Vermiform compost)

Google Photos upload tawh sa compress dan

Khampat Bungpui zar pakhat tliak

Runhmuidum hi i hre ngai em?

Windows leh Android-ah Mizo Ṭawng dik takin i chhu tawh ang u